Skuadra kryesuese e Premier League, Manchester City, ka arritur marrëveshjen prej 60 milionë eurosh për blerjen e mesfushori brazilian Fred nga Shakhtar Donetsk gjatë verës së ardhshme. Kryesuesit e Premier League janë bindur nga aftësitë e 24-vjeçarit gjatë përballjeve me skuadrën ukrainase në Champions League.
Shakhtar nuk e pranoi largimin e Fred në janar, sepse e konsiderojnë një aset të rëndësishëm dhe për ndeshjen e ardhshme në 1/8-t e finaleve kundër Roma, por pranoi 60 milionë euro nga City dhe firmosi transferimin e lojtarit në “Ettihad”, verën e ardhshme.
Manchester United ishte gjithashtu në monitorim të Fred, por ai zgjodhi të punojë me Guardiola. Braziliani shihet si një kopje e Fernandinho, që gjithashtu pati sukses me City, i ardhur nga Shakhtar. Në vitin 2013 ai shkoi në Donetsk, pikërisht për të zëvendësuar Fernandinho, që u transferua te City për 45 milionë euro.
