Trajneri i Sevilla, Vincenzo Montella, e ka përshkruar trajnerin e Manchester United, Jose Mourinho, si një “pionier” i taktikës së futbollit, në prag të përballjes mes tyre në 1/8-t e finaleve të Champions League. Të mërkurën skuadra e Jose Mourinho do të vizitojë spanjollët në një veprimtari që e ka fituar dy herë si trajneri i Porto dhe Inter, ndërsa ka fituar edhe dy herë Europa League me Porto dhe Manchester United. “Mourinho është një pionier kur bëhet fjalë për taktikën në futboll, – tha Montella në konferencën për shtyp. – Kam lexuar shumë libra ku përmendet ai dhe mendoj se është një nga rivalët më të vështirë për t’u përballur.”
Sevilla nuk është kualifikuar asnjëherë për në çerekfinalet e Champions League, ndërsa Manchester United ka humbur vetëm një nga tetë ndeshjet e fundit të luajtura ndaj ekipeve spanjolle, gjithsesi Montella mendon se skuadra e tij, që renditet në vendin e pestë të La Liga, është e gatshme të përballet si e barabartë me “djajtë”, që janë në vendin e dytë të Premier League. Italiani deklaroi: “E pres me padurim këtë ndeshje, ku duhet të jemi gati mendërisht dhe fizikisht. Do të jetë një ditë e madhe për klubin e Sevilla, një ndeshje e madhe. Nuk e di sa ndeshje të tilla ka pasur Mourinho në karrierën e tij, por për mua është e para. Ju garantoj se skuadra ime do të jetë gati për të synuar kualifikimin në harkun e dy përballjeve.”