Cengiz Ünder është “heroi” i ri për AS Roma. Futbollisti 20-vjeçar nga Turqia ka shënuar golin e parë për verdhekuqtë në fitoren 0-2 në fushën e Udinese, që e ngjit skuadrën e Eusebio Di Francesco përkohësisht në vendin e tretë të Serie A. Roma ka 50 pikë, ndërsa Inter, që do të luajë sonte në mbrëmje kundër Genoa, është në vendin e katërt me dy pikë më pak.
Roma tregoi një mbrojtje të “hekurt” kundër Udinese, ndërsa në sulm i tregua cinike me golin e Cengiz Ünder, i cili ka shënuar katër gola dhe ka dhënë një asist në tre ndeshjet e fundit të Serie A. Ai shënoi golin e vetëm në fitoren e kaluar në transfertë, 0-1 ndaj Verona, këtë herë tundi rrjetën 20 minuta para fundit. Verdhekuqtë dyfishuan shifrat në kohën shtesë me anë të Diego Perotti.
