Kanali francez ‘Telefoot’ ka zbuluar se futbollistët e skuadrës së PSG, janë takuar të premten e 16 shkurtit, për të kërkuar reagimin e ekipit parisien në ndeshjen e kthimit ndaj Real Madrid, e vlefshme për një vend në çerekfinalen e Champions League, në program për 6 marsin e ardhshëm. Një mbledhje kjo e organizuar nga vetë lojtarët e skuadrës kryesuese të Ligue 1, e imponuar nga disfata në “Santiago Bernabeu” në shifrat 3-1. Por, ajo që serviret nga media franceze si e çuditshme, ishte fakti që në këtë takim mungonte trajneri i skuadrës së PSG, spanjolli Unai Emery.
Takimi konspirativ u zhvillua në “Camp des Lóges”, aty ku është kampi stërvitor i PSG, dhe sipas asaj që rrëfen ‘Telefoot’ mbledhja është udhëhequr nga dyshja e futbollistëve brazilianë: Thiago Silva dhe Dani Alves, të cilëve u është bashkuar edhe Marquinhos. Sipas të njëjtit burim, në përfundim u dol në disa konkluzione, mes të cilave u theksua “bashkimi i shenjtë” dhe “solidariteti”, që duhet të mbizotërojnë në ndeshjen e kthimit.
