Talentet shqiptarë të futbollit nëpër botë janë kthyer në mollë sherri mes dy federatave përkatëse, Kosovës dhe Shqipërisë. Një politikë e ndarë, ku Kosova ndihet “e vjedhur”. Pavarësisht se presidenti i FSHF-së, Armand Duka, i rizgjedhur në mandatin e pestë, vijon të pohojë se raportet mes tij dhe homologut Fadil Vokrri janë të mira, e vërteta është ndryshe. Kreu i FFK-së, ka reaguar ashpër, duke thënë se nuk do të tolerohet më një situatë e tillë.
Burime të Report Tv bëjnë të ditur se të enjten e 22 shkurtit Vokrri do të takojë presidentin e FIFA-s dhe do t’i raportojë këtë situatë. Kosova, në 15 vitet e fundit, ka qenë furnizuese e Kombëtares A së Shqipërisë, ku gjysma e futbollistëve me origjinë kosovare kanë qenë gjithnjë pjesë e grupit kuqezi. Pra, edhe pse në publik duket se ka një raport të mirë, ku Vokrri dhe Duka ftojnë njëri-tjetrin në aktivitetet e federative respektive, çështja e talentëve i ndan shumë.
Nëse në rang ekipi përfaqësues, por edhe të kampionatit, Kosova është më poshtë Shqipërisë, sa i përket futbollit të pastër, ata janë më lart. Duke parë ngjarjet e fundit në Shqipëri, me trukimin e ndeshjeve, kontestimet e shpeshta ndaj gjyqtarëve, problemet me shoqatat e të tjera, Federata e Futbollit të Kosovës ka kërkuar një prokuror që të merret gjithçka që ka të bëjë me futbollin, kryesisht më çështjet e sipërpërmendura. Ndërsa Federata Shqiptare e Futbollit nuk ka çuar qoftë edhe një çështje në Prokurori, ndërsa për strukturë të veçantë as që bëhet fjalë.
