PSG-Real Madrid i planifikuar të luhet më datë 6 mars, nga ku do të përcaktohet ekipi që do të kalojë në çerekfinalen e Champions League, ka nisur të përjetohet që tani në “Parc des Princes”. Pas fitores së “Los Blancos” me rezultatin 3-1, që u jep atyre avantazhin për të kaluar në raundin tjetër të kompeticionit më të rëndësishëm europian, gjatë ndeshjes së të shtunës të luajtur mes PSG dhe Strasbourg e përfunduar me fitoren e parisienëve me rezultatin 5-2, një pankartë ofensive ndaj Real Madrid u evidentua në shkallët e stadiumit, ku shkruhej “Puta Madrid” ose “Madrid Kurva”.
Tifozët fanatikë të PSG janë të listuar mes grupimeve më të rrezikshëm në Europë, aq të frikshëm janë ata, saqë edhe vetë klubi i tyre i ka përjashtuar në vitin 2010, ndonëse u ripranuan shtatë vite më vonë, pasi nënshkruan një kod të mirësjelljes. Rreth 700 prej tyre ishin në Madrid në takimin e parë të të tetave, dhe ndonëse bënë të ndihej prezenca e tyre nëpër rrugët e Madridit, në stadium nuk pati asnjë incident të regjistruar.