John Kavanagh, trajneri i kampionit irlandez të arteve marciale mikse Conor McGregor, i ka të qarta idetë në lidhje me rivalin e radhës së “nxënësit” të tij. Sipas tij, McGregor duhet fillimisht të përballet me fituesin e duelit mes Tony Ferguson dhe Khabib Nurmagomedov e më pas të kompletojë triologjinë ndaj rivalit të tij më të egër, Nate Diaz. “Conor dhe Nate kanë një marrëdhënie të mirë mes tyre, për sa i përket rivalitetit në kafaz dhe respektit që kanë ndaj njëri-tjetrit, si dy kampionë dhe ikona të MMA-së. Një përballje mes tyre do të jetë sërish magjike. Por unë mendoj se Conor duhet të vendosë disa përparësi, duke dueluar fillimisht me fituesin e duelit Ferguson-Nurmagomedov dhe më pas ndaj Diaz”, u shpreh Kavanagh në një intervistë për “The Mac Live”.
Që nga koha kur Conor dhe Nate kanë dueluar për herë të fundit mes tyre, në gushtin e vitit 2016, irlandezi ka zhvilluar vetëm një sfidë tjetër në kafaz dhe më pas ka dueluar në një përballje boksi me Mayweather. Por edhe Diaz ka gati dy vjet që nuk duelon në kafaz, që pasi humbi revanshin, por këtë vit ka deklaruar se do të rikthehet sërish aktiv. “Mbetem i mendimit se Conor është një kampion dhe duhet të rimarrë titujt që iu hoqën ndaj fituesit të duelit mes Ferguson dhe Nurmagomedov. Por të njëjtën gjë duhet të bëjë edhe Nate, të zhvillojë një duel ndaj Tyron Woodley fillimisht, pasi kam dëgjuar që dy sportistët janë të interesuar për këtë sfidë. Dhe më pas të mendojmë për sfidën e madhe Diaz-McGregor, që mendoj se do të thyejë çdo rekord shikueshmërie”, tha Kavanagh.
