Paris Saint-Germain është kritikuar ashpër nga ish-anësori i tij, Lucas Moura, i cili është i tejet i pakënaqur me mënyrën sesi e ishte trajtuar në klub.
Në janar, ai i dha fund kohës te lideri i Ligë 1 të Francës duke iu bashkuar Tottenhamit në Premierligë.
Pas transferimit, ai e ka kritikuar PSG-në në një intervistë për France Info, për kohën që e kishte kaluar në kryeqytetin francez.
“Ende s’e kuptoj pse papritmas nuk luaja më, sepse vija nga sezoni më i mirë që kisha”, ka thënë ai.
“Isha golashënuesi i dytë më i mirë, kisha shumë asiste dhe isha lojtari më i përdorur, por pastaj papritmas, sezoni nisi dhe unë nuk luaja”, shtoi ai.
Ai i ka përshkruar gjashtë muajt e fundit te PSG-ja si më të vështirët në karrierë.
“Ato ishin gjashtë muajt më të vështirë të karrierës time dhe kisha nevojë për ndryshim, por atje nuk u trajtova mirë dhe nuk m’u dha rasti dhe s’e kuptoj pse”, theksoi ai.