Mateo Kovacic po kthehet në një nga lojtarët më të përdoruar nga Zinedine Zidane në ndeshjet e fundit që ka luajtur Real Madrid. Futbollisti kroat po tregon një nivel më shumë se të mirë, teksa ka kaluar edhe problemet fizike që ka pasur gjatë këtij sezoni.
23-vjeçari duket se ka bindur trajnerin francez që mund të jetë një lojtar i rëndësishëm për skuadrën për të siguruar dhe vazhdimësinë në “Santiago Bernabeu”. Në fakt dëmtimet që ka pësuar mesfushori gjatë kësaj periudhe kanë ulur rendimentin dhe ritmin e mirë që ka pasur (iu desh të ndalej për rreth 2 muaj, ku humbi edhe 14 ndeshje), por me rikthimin në skuadër ka treguar që ka një nivel të lartë dhe se ka hedhur pas krahëve të gjitha shqetësimet fizike.
Kovacic ka qenë titullar në 6 nga 8 ndeshjet e fundit, të gjitha në favorin e tij, pasi asnjëherë më parë nuk ka pasur kaq vazhdimësi nën drejtimin e trajnerit Zinedine Zidane. Sipas asaj që shkruan “Marca”, një nga çelësat e suksesit të këtij ndryshimi pozitiv është shkathtësia e lojtarit në mesin e fushës, që bën që Zizou ta përdorë në çdo pozicion në këtë repart të merengues, qoftë për të zëvendësuar Modric, ashtu si Kroos ose Casemiro.
Rikuperimi i versionit më të mirë të Kovacic është pa dyshim një lajm shumë i mirë për skuadrën madrilene që në këtë fund sezoni luajnë objektivin e madh, të ngrejnë lart trofeun e Champions League. “Los Blancos” duan të rikshkruajnë historinë në këtë kompeticion, pasi synojnë ta fitojnë për të tretin vit radhazi, si asnjë skuadër tjetër më parë.
