Uganda “fal” Junus Sentamunë. Më në fund, përfaqësuesja e ekipit afrikan ka hedhur pas krahëve skandalin seksual që ndodhi janarin e kaluar, ku ishte përfshirë edhe numri 11 i Tiranës. Sulmuesi ka marrë ftesë nga kombëtarja pas gati 14 muajsh mungesë. E fundit herë që ishte grumbulluar përkon me 25 janarin e 2017-ës, në ndeshjen kundër Malit.
Asokohe sapo ishte zbuluar veprimi i tij, që siguronte prostituta për shokët e ekipit. Junus Sentamu u pezullua nga kombëtarja, por nuk u largua kurrë nga grumbullimi. Vendimi u mor prej trajnerit dhe drejtuesve të federatës vendëse, pasi nuk donin që skandali të zmadhohej. Sulmuesi, edhe pse ishte pjesë e Ugandës, nuk u aktivizua për asnjë minutë gjatë turneut të Kupës së Kombeve të Afrikës.
E fundit në një miqësore përballë Sllovakisë, ku e nisi nga stoli. Megjithatë, kur ka kaluar më shumë se një vit nga kjo histori, në Ugandë e kanë hedhur pas krahëve atë skandal. Ata kanë vlerësuar performancën e mirë të këtij futbollisti, ndaj kanë menduar që të sulmuesin ta llogarisin si pjesë të organikës për dy miqësoret që zhvillojnë në fund të muajit mars, e para ndaj Malauit, ndërsa e dyta është ende me kundërshtar të papërcaktuar.
Sentamu po bën një sezon realisht të mirë me Tiranën, ndërsa duhet thënë që pas 19 javësh të luajtura e ka gjetur 11 herë rrjetën, duke dëshmuar se është një garanci më shumë në majën e sulmit. Bie në sy mungesa e ugandezit tjetër Toni Maveje, i cili nuk ishte i pranishëm në listën që publikoi dje trajneri Sebastien Desabre.
