Juventus eliminoi Toottenhamin nga Liga e Kampionëve, pas fitores në Wembley, me rezultatin 2-1. Ndeshja e parë në Torino përfundoi me rezultatin 2-2 dhe falë triumfit në Londër, “Zonja e Vjetër” është kualifikuar në çerekfinale të garës më të madhe evropiane për klube.
Bardhezinjtë u gjetën nën presionin e Spursave në pjesën e parë dhe pësuan gol nga Son Heung-Min, mirëpo në pjesën e dytë u kthyen për ta përmbysur rezultatin me anë të Gonzalo Higuain dhe Paulo Dybala.
Në fund të ndeshjes në Wembley, fitores së Juves i është gëzuar edhe një tifoz i Arsenalit. Mbështetësi i Topçinjve ndodhej në mes të tifozëve të Juventusit dhe në momentin e duhur ka nxjerrë fanellën e Arsenalit për të festuar eliminimin e Spursave.
Tottenhami është rivali më i madh lokal i Arsenalit dhe natyrisht që ekziston një rivalitet i madh ndërmjet tifozëve, të cilët gëzohen edhe kur ata humbin nga një ekip tjetër.
Theksojmë se skuadra e Arsene Wenger këtë edicion nuk ka marrë pjesë në Ligën e Kampionëve, ndërsa rrezikon që të mos luajë edhe në sezonin e ardhshëm.
