Anglia ka fituar 1-0 në Amsterdam ndaj Holandës në miqësoren e luksit që “luanët” e luajtën në kuadrin e përgatitjeve për Kupën e Botës 2018, veprimtari të cilën Holanda do ta shohë nga televizioni. Anglia ka humbur vetëm 1 nga 8 ndeshjet e fundit të luajtura në Holandë.
Anglia luajti më mirë në pjesën e parë dhe dominoi në qarkullimin e topit, por tentativat e Rashford, Oxlade-Chamberlain dhe Henderson nuk ishin të sakta, teksa që në fillim të ndeshjes u dëmtua mbrojtësi Joe Gomez, i zëvendësuar nga Harry Maguire.
Kur u mbush një orë lojë, superioriteti territorial i miqve u shpërblye. Sulmuesi i Manchester United, Jesse Lingard goditi saktësisht nga jashtë zone duke mposhtur portierin Zoet dhe duke “njollosur” me humbje ndeshjen e parë të Ronaldo Koeman në stolin e Holandës.
