Nëse kampionati do të kishte nisur në vitin 2018, Vllaznia do të ishte një prej skuadrave që garojnë për kupat e Europës.
Fatkeqësisht, prej ecurisë jo të mirë gjatë dy fazave të para, paraqitjet fantastike të skuadrës në këtë periudhë do të shërbejnë për të korrigjuar gabimet e së kaluarës.
Shkodranët kanë një prej ekipeve më në formë, mbi të gjitha në fazën e tretë të Kategorisë Superiore. Tre fitore, dy barazime dhe vetëm një humbje, edhe kjo ndoshta e pamerituar në fushën e Laçit.
Në javët e fundit, më mirë se kuqeblutë kanë bërë vetëm Skënderbeu kryesues dhe Kukësi i shkëputur nga ndjekësit në luftën për vendin e dytë.
11 pikë të grumbulluara prej fillimit të muajit shkurt, por mbi të gjitha një mbrojtje që jep garanci. Vetëm një gol i pësuar në gjashtë ndeshjet e fundit të kampionatit.
Dora e trajnerit Gjoka në repartin difensiv jo vetëm që ndihet, por po ndihmon skuadrën të ngushtojë diferencën me ekipet e tjera, në objektivin për t’u larguar nga zona e rënies nga kategoria.
Një Vllazni e tillë entuziazmon në fushë dhe jo më kot tifozët shkodranë po kthehen në stadium.
Shpeshherë në “djepin e futbollit” vetëm pikët nuk mjaftojnë, një tregues ky që kuqeblutë diçka të mirë po e bëjnë edhe në aspektin e lojës.
Përpara sfidës së kësaj të mërkure në “Loro Boriçi”, Partizani është i paralajmëruar.
