Arsenali po shikon mundësinë për të nënshkruar me mesfushorin e Real Madrid, Dani Ceballos. 21-vjeçari u transferua vetëm verën e kaluar tek kampionët e Spanjës nga Real Betis.
Ai ka luftuar për të fituar një vend në formacionin e Zidane që nga ai moment, por pa sukses. Spanjolli është i gatshëm të largohet nga Bernabeu pas vetëm një sezoni dhe disa klube në Evropë po e ndjekin atë. Një ndër to është Arsenali dhe ata po peshojnë mundësinë, nëse do të bëjnë një ofertë zyrtare këtë verë sipas “El Confidencial”.
“Topçinjtë” thuhet se e kanë ndejkur mesfushorin gjatë kohës së tij në Real Betis dhe Arsene Wenger është një tifoz i spanjollit.
Vetëm javën e kaluar, u raportua, se Liverpool-i ishte i etur për të nënshkruar mesfushorin, por do t’i duhet të mposhtë Romën, pasi edhe verdhekuqtë kanë shfaqur interes për 21-vjeçarin. Në fakt duke parë moshën e tij të re dhe kualitetin, edhe Juventusi ka shprehur dëshirën për ta afruar në Torino verën e ardhshme të riun premtues.
