Leonardo Bonucci beson se ai, gjithashtu, mund ta kishte humbur kontrollin, nëse ende po luante për Juventusin, kur u dha penalltia në favor të Real Madridit, në çerekfinalen e kthimit të Ligës së Kampionëve. Gianluigi Buffon u largua në këtë moment, pasi reagoi me zemërim kundër gjyqtarit Michael Oliver, i cili dha atë penallti të diskutueshme në minutën e 93-të dhe shuajti shpresat e bardhezinjve për të avancuar më tej në këtë kompeticion.
Bonucci, i cili u largua nga Juve për Milanin në fund të sezonit të kaluar, tha se i ishte mirënjohës Zotit, që nuk ishte i pranishëm, kur u dha penalltia, për një faull të Medhi Benatia ndaj Lucas Vazquez. “Çfarë mendova unë në atë moment? Faleminderit Zotit që nuk isha aty, kur gjyqtari akordoi penalltinë, – i tha ai “Premium Sport”. – Mendova se ndoshta nuk mund t’i mbaja nën kontroll instinktet e mia”.
Bonucci shtoi: “Gigi është portieri më i mirë në historinë e futbollit”. Real Madridi do të përballet me Bayern Munich në gjysmëfinale të Ligës së Kampionëve, ndërsa Liverpool do të takohet me Romën.
