Kujtohen te Tomori, këtë herë jo nëpërmjet shtypit të shkruar dhe atij audioviziv, por nëpërmjet kërkesës zyrtare që tashmë e kanë depozituar në FSHF. Bëhet fjalë për titullin e mohuar 18 vite më parë, pikërisht në sezonin 1999-2000.
Beratasit atë sezon u renditën të parët në tabelën e klasifikimit me 52 pikë, po aq sa Tirana, por që titulli u vendos që të diskutohej në një ndeshje shtesë. Takimi shtesë u luajt, Tomori dhe Tirana u ndanë në barazim 1-1 në 90 minuta ku dhe shtesat nuk prodhuan gol. Gjithçka u përcaktua nga penalltitë dhe bardheblutë ngritën trofeun lartë.
Saktësisht, me rregullore nuk përcaktohej diçka e tillë. Që do të thotë se është bërë një shkelje në dëm të klubit beratas, i cili u ndje i vjedhur në atë periudhë. Por, te Tomori me sa duket ecin mbi bazat e një fjale të urtë popullore “vonon por nuk harron”.
Drejtuesit e këtij klubi kanë përpiluar kërkesën e tyre në FSHF, duke arsyetuar se pse titulli i sezonit 1999-2000 i duhet dhënë ekipit Tomori. Nëse ky trofe iu jepet beratasve, atëherë ata do të festojnë një titull pikërisht në vitin kur klubi i tyre plotëson 95 vite histori.
Nga ana tjetër, Tiranës i shtohet një problem më shumë. Përpos çështjes së UEFA-s që iu ka mohuar 215 mijë euro, tashmë duhet të mendojnë edhe për titullin e vitit 2000, i cili ka qenë i nëntëmbëdhjeti në historinë e tyre ku kanë koleksionuar 24 të tillë. Në rast se ky trofe do t’iu hiqet, atëherë do të mbeten me 23 tituj.