Njëri është bërë trajneri i Italisë (ndoshta edhe për pak kohë), tjetri vazhdon të dhurojë gola dhe spektakël në fushë. Çfarë kanë të përbashkët Gigi Di Biagio dhe Cristiano Ronaldo? Historinë e një këmimi fanellash të zhvilluar në 2002-in e largët, e rrëfyer nga ish-mesfushori pas paraqitjes të mrekullueshme të CR7 në sfidën kundër Juventus.
Edhe italiani nuk ka mundur të bëjë gjë tjetër veçse të duartrokasë portugezin. I ftuar në studiot e “Mediaste Premium”, Di Biagio ka rrëfyer me krenari një prapaskenë të 2002-it, kur luante tek Inter dhe luante një ndeshje paraeliminatore të Champions League kundër Sporting-ut të Cristiano Ronaldo-s.
Në atë rast, në fundin e ndeshjes, i riu portugez, i cili nuk ishte akoma i njohur, i kërkoi Di Biagio-s të këmbenin fanellat. Një gjest ky që befasoi ish-futbollistin e Roma-s. “E kam në shtëpi fanellën e Cristiano Ronaldo-s sepse më kërkoi timen në fundin e ndeshjes kundër Sporting Lisbonës. Në të vërtetë unë doja ta këmbeja me Pedro Barbosa-n, që ishte kapiteni i Sporting, por pashë atë fëmijë që ma kërkoi dhe një fëmije nuk mund t’i thuash kurrë jo”, ka thënë Di Biagio.
