Premier League ka mbyllur derën për aplikimin e teknologjisë në sezonin e ardhshëm. Video Assistant Referre (VAR) është testuar në disa takime këtë sezon, por duket se rezultatet kanë qenë kontroverse.
Kjo të paktën thuhet nga ana e drejtuesve të Ligës, që zyrtarizuan edhe vendimin për të mos e përdorur teknologjinë VAR as në sezonin 2018-2019. Teknologjia në fushë aplikohet në Serinë A dhe Bundesligë, ndërsa do të përdoret edhe në Kupën e Botës ‘Rusi 2018’.
Së fundi është hapur edhe një debat mbi përdorimin e tij në Champions dhe Europa League, por UEFA e ka kundërshtuar me arsyetimin se nuk është ende gati për ta implementuar teknologjinë ndihmëse të arbitrimit.
Gjithsesi, tashmë në krah të UEFA-s duket se del edhe Premier League, që vendos t’i thotë ‘JO!’ teknologjisë, të paktën edhe për sezonin e ardhshëm.
