Situata tek Partizani duket sa e trazuar aq edhe e ndërlikuar. 15-herë kampionët e shqipërisë prej vitesh janë të zhgënjuar nga paraqitja e kryeqytetasve. Së fundmi aludohet se klubi ka arritur një parakontratë me trajnerin Mario Tokiç. Kroati ishte prezent të hënën në “Selman Stërmasi” për të parë Partizani-Skënderbeu.
Gjithsesi, klubi i ka hedhur poshtë zërat për ballkanasin, i cili është përfolur që në janar. Klubi akuzoi mediat se po destabilizon Partizanin, por Mario Tokiç nuk ishte në stadium për llogari të mediave, por të Partizanit. Të kuqtë janë treguar shumë kërkues, pasi bisedimet me Tokiç janë zhvilluar prej kohësh.
Ekziston një prapaskenë e gjatë për të bindur kroatin që të marrë drejtimin e skuadrës së sezonit të ri. Klubi e ka mohuar se është në bisedime me trajner të ri, pasi beson te Klevis Dalipi. Në fakt klubi ka të drejtë, pasi nuk bëhet fjalë që kroati të nisë punë tani. Ky edicion pritet të mbyllet nga Dalipi.