Trajneri Shpëtim Duro jep dorëheqjen nga Flamurtari. Lajmin e ka konfirmuar vetë Duro në intervistën për RTSH pas ndeshjes së sotme kundër Skënderbeut, ku vlonjatet u eliminuan nga Kupa e Shqipërisë.
“Në pjesën e parë u munduam dhe ishte rezultati i barabartë. Në pjesën e dytë, pas shtyllës së Danilos pësuam gol. Skuadra ka humbur besimin dhe këtë e shoh nga dita në ditë. Sot u takova me skuadrën dhe nuk do të jem më trajner i Flamurtarit. Kjo është mëse normale duke parë këtë situatë. Marr përgjegjësinë time si trajner. Këtë vendim e di që nuk do ta mirëpres presidenti Idrizi, i cili ka këmbëngulur që unë të qëndroj.
Kam kaluar shumë mirë te Flamurtari, kam marrëdhënie shumë të mira me presidentin Idrizi. Por rrëshqitja e skuadrës gjatë javëve të fundit bën që unë të largohem. Nuk bëj prapaktheu nga vendimi im. Kjo është në të mirë të skuadrës dhe presidentit Idrizi”, deklaroi Shpëtim Duro.
