Trajneri i Atletico Madrid, Diego Simeone, përballet me rrezikun e mungesës në finalen e Europa League, nëse skuadra e tij kualifikohet ndaj Arsenal.
Argjentinasi do të jetë i skualifikuar në gjysmëfinalen e kthimit në Madrid, pasi u përjashtua nga gjyqtari në takimin e parë të barazuar në Londër, si pasojë e një proteste të ashpër ndaj kryesorit.
UEFA bëri të ditur se të premten, 24 orë pas gjysmëfinales do të shqyrtojë sjelljen e trajnerit dhe me shumë gjasa ai do të skualifikohet për dy ndeshje. Ndeshjen e dytë do ta shlyejë në finale, ose në edicionin e ardhshëm të Champions League, ku Atletico e ka siguruar qëndrimin si rrjedhojë e renditjes në La Liga.
Simeone nuk akuzohet vetëm për sjelljen ndaj gjyqtarit, por edhe për faktin se ka komunikuar me stafin e tij që ishte në stol, edhe pse kjo nuk lejohet me rregullore.
