E sheh gotën gjysmë plot Rino Gattuso pas derbit të mbyllur pa gola kundër Inter.
“Eshtë një pikë e fituar sepse në më shumë se në një rast rrezikuam të pësonim gol. Për atë që bëri, Inter meritonte diçka më shumë,” – tha trajneri i Milan.
“Ne ditëm të vuajmë dhe faktikisht patëm edhe rastet tona. Taktikisht ishte një ndeshje e vështirë për ne. Komplimentoj ekipin e Inter dhe kjo është një pikë që më shijon shumë. Spalletti ka bërë disa korrigjime që e kanë bërë sërish të fortë ekipin e tij,” – vazhdoi Gattuso.
“Timonieri” kuqezi ka analizuar edhe renditje: “Derisa matematika na jep shpresë do të vazhdojmë të luftojmë për një vend në Champions League. Kanë mbetur edhe 8 ndeshje dhe mundësia ekziston. Në 20 minutat e fundit ishim të lodhur dhe tani duhet të rikuperojmë energjitë.”
Në fund, Gattuso komenton edhe gabimin e Kalinic, në rastin më të mirë që pati Milan: “Nëse nuk po luan në maksimumin e potencialit të tij është edhe faji ynë. Futbollistët e mi janë ndër më të mirët në qarkullim dhe është detyra ime t’i vendos në kushtet ideale që ta shprehin të gjithë potencialin e tyre.”
