Trajneri i njohur italian, Giovanni Trapattoni dikur thoshte: “Mos thuaj mace, nëse nuk e ke futur në thes” (Pak e shumë në shqip është mos u gëzo para kohe). E aplikuar në botën e futbollit ky rregull nuk njeh asnjë përjashtim, as edhe në Angli.
Në fakt, në minutën e 94-t të ndeshjes mes Woking FC dhe Macclesfield Town, episodi kyç i ndeshjes konsumohet në mënyrën më të çuditshme të mundshme. Rezultati ishte i fiksuar në shifrat e barabarta 2-2.
Aksion sulmuesi i Macclesfield nw minutat shtesë me sulmuesin që djeg me shpejtësinë e tij portierin në dalje dhe godet topin drejt portës së boshatisur.
Sakaq, mbrojtësi i Woking Fc, Ferdinand dorëzohet para kohe, duke u dëshpëruar dhe nuk e kupton që topi në fakt ka ngecur në baltën e krijuar pak hapa para vijës fatale të portës dhe nuk hyri në portë.
Mirëpo, më i shkathët dhe i vëmendshëm është treguar sulmuesi kundërshtar Danny Whitehead, i cili ka nxitur për të shtyrë topin drejt rrjetës, duke shënuar kështu edhe golin e fitores.
Një gafë që i dha mundësi Macclesfield të ngjitet në vendin e parë të kategorisë National League. Ndërkaq, edhe Ferdinand u bë shumë i famshëm (ndonëse në aspektin negativ) për një ditë, pasi videoja e golit dhe reagimit të tij qesharak po bën xhiron e rrjetit dhe është parë nga një numër shumë i madh njerëzish në gjithë globin.
