Pas kampionatit Europian Elseid Hysaj ishte në qendër të vëmendjes, teksa po bisedohej për rishikimin e kontratës me Napolin. Ajo që mbrojtësi kishte bërë në Serie A me ekipin e Maurizio Sarri-t ishte vlerësuar nga të gjithë dhe skuadra italiane nuk mund ta linte shkodranin të largohej për ndonjë shifër të ulet, ndaj edhe i ofroi rinovimin me përmirësim të kushteve financiare, si dhe në kontratë u shtua një klauzolë prej 50 milionë eurosh për klubet jashtë Italisë.
Tanimë historia është e njëjtë. De Laurentiis po bisedon me menaxherin e mbrojtësit të kombëtares, Mario Giuffredi-n, teksa për Hysajn është ofruar rinovimi i kontratës deri në vitin 2023. Nëse gjendet gjuha e përbashkët, atëherë klauzola për 24-vjeçarin do të jetë më e lartë. Por në garë për të janë futur edhe klube të tjera jashtë Italisë. Në mediat e vendit fqinj është raportuar për një ofertë të një klubi që është i gatshëm të paguajë 50 milionë eurot e parashikuara në klauzolë.
Vetë Hysaj dëshiron shumë që të fitojë titullin me Napoli-n, si dhe nuk e ka shprehur dëshirën për të vazhduar aty, por sigurisht që një aventurë me gjermanët e Bayern Munchen sigurisht që e tërheq. Zërat kanë qenë të shumta për interesimin nga bavarezët dhe deri në fund të muajit maj pritet të marrin përgjigje shumë pikëpyetje. Vera do të jetë edhe sivjet e “nxehtë” për Hysajn dhe së fundmi ka qenë gazetari italian Ciro Venerato, ai i cili ka folur për interesimin e dy klubeve anglezë për shkodrann.
Në emisionin “Si Gonfia la Rete” që transmetohet në “Radio Marte”, mes të tjerave ai ka thënë: “Dy klube të Premier League mund të ‘hidhen mbi të’, një prej tyre mund të jetë Arsenal-i”. Klubi tjetër anglez që është lakuar që interesohet për Hysajn është Manchester United. Skuadra e drejtuar nga Jose Mourinho kërkon të përforcojë prapavijën dhe mbrojtësi është një nga emrat e përmendur për t’iu bashkuar. Më parë edhe Chelsea është përfolur si opsion.
