Lionel Messi, futbollisti më i paguar i planetit, ka fituar sot betejën ligjore duke marrë të drejtën për të regjistruar emrin e tij si një markë e mirëfilltë për veshjet sportive, pasi në komisioni i Komitetit Europian e kishte penguar pak ditë më parë me justifikimin se ai ishte shumë i famshëm dhe kjo mund t’i krijonte probleme markave të tjera.
Sulmuesi i Argjentinës dhe Barcelonës fitoi në këtë mënyrë një sfidë shtatë vjeçare me markën e veshjeve kryesisht për çiklizëm, spanjolle Massi, që ishte ankuar për ngjashmërinë e emrave.
Tanimë, gjykata e BE në Luksemburg, e dha vendimin e saj: “Lionel Messi mund të regjistrojë markën e tij “MESSI” për veshje sportive. Ka një ngjashmëri me “MASSI”, por kjo nuk përbën motiv për të penguar dikë të merret me biznes.”
Sulmuesi i Barcelonës fiton rreth 126 milionë euro në sezon, por duket se kjo shifër do të rritet ndjeshëm tani që ai do të hedh në treg veshjet e markës “MESSI”, një lëvizje që pritet ta kthejë argjentinasin, pesë herë fitues të “Topit të Artë”, në një miliarder.
