Trajneri i Paris Saint-Germain, Unai Emery, pret që Neymar të rikthehet në fund të muajit prill dhe pranon se nuk ka biseduar me drejtuesit e klubit francez për të ardhmen e tij pas këtij sezoni…
Duke folur në konferencë për shtyp, para ndeshjes së ditës së premte kundër Saint-Etienne, Emery tha se në javët e ardhshme Neymar do jetë pjesë e ekipit.
“Fola para pak ditësh me Neymar dhe më tha se po vazhdon të punojë individualisht dhe për dy apo tre javë do të kthehet në stërvitje me ne,” – tha Emery.
Thomas Tuchel, Mauricio Pochettino dhe Massimiliano Allegri janë përmendur si emrat që mund të zëvendësojnë trajnerin Emery në sezonin e ardhshëm.
“Nuk kam folur me drejtuesit për të ardhmen. Kontrata ime përfundon në maj. Atëherë do të jetë momenti i duhur për të trajtuar këtë temë. Pas eliminimit nga Champions League jam i përqendruar te titulli kampion, të cilin duam ta sigurojmë sa më parë,” – tha Emery.