Barazim miqësor mes Shqipërisë dhe Kosovës së 15-vjeçarëve, me përballjen e” Elbasan Arenës” që u mbyll në barazim 1-1. Miqësorja vëllazërore për ekipet e moshave ishte plot ritëm ndërsa nuk munguan as episodet e diskutueshme për një penallti të dhënë në favor të Shqipërisë dhe një gol të anulluar për Kosovën (. Pjesa e parë ishte përgjithësisht e ekuilibruar ndërsa në pjesën e dytë Kosova u shfaq më mirë pavarësisht se golin e parë e gjetën kuqezinjtë e vegjël falë një 11-metërshi të fituar nga Mezani dhe të kthyer në gol nga Eugen Sulaj.
Në disavantazh Kosova kërkoi me ngulm golin dhe e gjeti në të 53-tën me Elvin Jasharin por poziconi i këtij të fundit u cilësua si i parregullt. Në të 57-tën golit ju afrua dhe Nishori me një goditje nga distanca, ndërsa në të 61-tën Yllnor Tahiri mundi të barazojë rezultatin pas një goditje mjaft të bukur në hyrje të zonës.
Në minutat e mbetura Kosova pati dhe një mundësi të mirë me Rexhepin por Bekteshi mundi të presë duke ruajtur barazimin ndërsa në të 74-trën Shqipëria ju afrua golit por topi u largua mbi vijën fatale. Kjo ishte vetëm miqësorja e parë sepse pas 2 ditësh në datën 5 maj, Shqipëria dhe Kosova do të sfidojnë sërish njëra-tjetrën këtë herë në stadiumin Loro Boriçi të Shkodrës.
