Futbollistët e Brazilit dhe stafi teknik do të përfitojnë secili nga 861 mijë euro, nëse arrijnë që të dalin kampionë bote në Rusi 2018. Federata braziliane e futbollit vendosi që t’u japë këtë shpërblim futbollistëve, i cili konsiderohet si mjaft i madh, që t’i motivojë ata edhe më shumë ndërsa Kupa e Botës do edhe 16 ditë që të fillojë.
Kombëtarja e drejtuar nga trajneri Tite, konsiderohet si një ndër favoritet për të fituar këtë kompeticion. Nëse verdhejeshilët ia dalin, atëherë ky do të jetë i gjashti në historinë e tyre. Sipas gazetës braziliane “Fola de Sao Paulo” shuma e rezervuar nga federata, është shumë e përafërt me shpërblimin 34 milionë euro, që do të marrë nga FIFA nëse fiton titullin.
Drejtuesit e federatës brazilian publikuan bonusin që lojtarët do të marrin që të shmangin diskutimet dhe debatet brenda kombëtares gjatë kompeticionit. Të tilla tema shpërqendrojnë ekipin, ashtu sikur ndodhi në botërorin e 90 në Itali, ku verdhejeshilët u mundën nga Argjentina në 1/8-at e kompeticionit.
