Chelsea dhe Manchester United do të kenë një mundësi të fundit për të shpëtuar sezonet e tyre pasditen e së shtunës. “Blutë” kanë zhgënjyer më shumë, duke e mbyllur Premier League në vendin e pestë pasi e nisën sezonin si kampionët në fuqi.
Ka qenë padyshim një rënie e madhe në rendiment nga ana e ekipit të Antonio Conte, që mund t’i kushtojë vendin këtij të fundit. Situata e Jose Mourinho, nga ana tjetër, nuk është aq e keqe sa ajo e kolegut të tij italian.
“Djajtë e Kuq” e kanë mbyllur kampionatin në vendin e dytë, por paraqitja e treguar nga skuadra në këtë sezon ka krijuar shumë pakënaqësi mes tifozëve. Gjithsesi, duket trajneri portugez është në avantazh.
Manchester United, në fakt, ka fituar shtatë ndeshjet e fundit që ka luajtur në “Wembley”, duke përfshirë këtu edhe fitoren e marrë kundër Tottenham në gjysmëfinalen e luajtur muajin e kaluar.
Chelsea, nga ana tjetër, ka patur një rrugë më të lehtë në Kupën e Anglisë, duke u përballur me skuadra, si Norwich, Newcastle, Hull, Leicester dhe Southampton. Megjithatë, dy nga këto ndeshje kanë shkuar me shtesë.
Shifra dhe Fakte
– Chelsea ka marrë tre fitore,dy barazime dhe dy humbje në shtatë ndeshjet e fundit që ka luajtur kundër Manchester United.
– Manchester United ka fituar shtatë ndeshjet e fundit të Kupës së Anglisë që ka luajtur në “Wembley”.
– “Djajtë e Kuq” kanë fituar 80% të ndeshjeve të këtij edicioni të kupës pa pësuar gol.
– Chelsea nuk ka arritur të shënojë në tri nga katër humbjet e fundit që ka pësuar në të gjitha kompeticionet.
– United nuk ka pësuar gol në pesë nga dhjetë ndeshjet e fundit që ka luajtur në të gjitha kompeticionet.
