Një tifoz i Marseille e ka përjetuar shumë keq humbjen e skuadrës së tij në finalen e Europa League kundër Atletico Madrid. Ok, skuadra e zemrës u mund dhe nuk arriti të ngrinte trofeun pas një sezoni fantastik në Europë, por reagimi i tij ishte i tepruar në maksimum.
Dhe më e bukura është se kjo nuk është hera e parë që reagon në këtë mënyrë. Video e bërë virale në rrjetet sociale nis me Henni-n, siç e quajnë tifozin, duke goditur TV-në me shkop e më pas me shkelma, për ta mbyllur me një goditje me kokë…
Ai dëgjohet teksa shan skuadrën e drejtuar nga Rudi Garcia para se të ndërmarrë një veprim drastik. Pavarësisht kundërshtimit të shokut të tij, Henni e hedh televizorin në një lumë që ndodhet pranë shtëpisë së tij për të kërcyer sërish mbi të me të dy këmbët.
Humbja e skuadrës franceze nga Atletico solli edhe në stadium një reagim të ashpër të tifozëve të OM, të cilët u përleshën në rrugë me policinë. Të paktën 33 vetë u arrestuan ndërsa pati edhe zjarrvënie makinash dhe shkatërrime të dyqaneve në rrugët e Lionit.
Tifozi i veçantë është i njohur për sjelljen e tij të shfrenuar, pasi të njëjtën gjë ka bërë edhe kur Marseille u mund 3-0 nga Paris SG në fillim të sezonit.
