Karlo Tavekio, ish-presidenti i Federatës Italiane të Futbollit, më në fund ka zbuluar prapaskenat e emërimit të Xhiampiero Venturës në stolin e Italisë, duke hequr dorë nga akordi paraprak që kishte me Xhani De Biazin.
Ky i fundit kishte deklaruar shpesh se para Euro 2016 kishte arritur marrëveshje me Italinë dhe një emër i njohur shtyu Tavekion të ndryshonte mendje. Tavekio konfirmon gjithçka, përfshirë edhe faktin se personi në fjalë ishte Marçelo Lipi, ish-trajneri i Italisë që e shpalli kampione bote në vitin 2006.
“Unë kisha pasur disa kontakte dhe kisha nisur bisedimet me De Biazin, trajnerin e Shqipërisë. Më kishte pëlqyer gjatë bisedimeve, kishte punuar mirë me Kombëtaren e tij”, shpjegoi Tavekio në një intervistë për mediat italiane, ku shpjegoi më pas pse këto biseda nuk ishin konkretizuar me një firmë.“Një ditë më telefonoi Malago (presidenti i Komitetit Olimpik Italian) dhe më ftoi për drekë në shtëpinë e tij. Kur hyra brenda gjeta të ulur aty Marçelo Lipin, nuk e dija që ishte i ftuar. Më folën për projektin që shihte Lipin si drejtor teknik dhe Venturën trajner.
Një rrogë e përbashkët prej 2 milionë eurosh ishte brenda buxhetit të federatës, pastaj tërheqja e statusit të Kampionit të Botës më bindi. Por pas pak ditësh mësova se për Lipin ekzistonte një problem për shkak të rolit të të birit, që e detyroi të tërhiqej. Në fillim nuk e priti aq mirë, më telefonoi dhe më tha ‘çfarë po ndodh kështu?’. Por iu përgjigja se isha po aq i çuditur dhe ai u tërhoq. Ndaj Ventura mbeti i vetëm”, tregoi Tavekio vendimin që mori asokohe për të emëruar Venturën në vend të De Biazit, një gabim që la Italinë pa pjesëmarrjen në Botëror.
