Jose Mourinho ka marrë Stefano Rapetti në stafin e tij te Manchester United, ku do të ngarkohet me postin e përgatitësit atletik të “djajve”. Mourinho dhe Rapetti kanë punuar së bashku te Inter, ndërsa në këtë sezon ai ishte në stafin e Gianpaolo te Sampdoria dhe ka qenë ky i fundit që ka konfirmuar lajmin e largimit të bashkëpunëtorit për në “Old Trafford”.
Mourinho po mendon për rifreskimin e stafit teknik të Manchester United, pasi ndihmësi i tij Rui Faria do të shkojë te Benfica.
Krahas Rapetti, te United do të punojë si trajner i ekipit të parë edhe Keiran McKenna, i promovuar nga skuadra U-18, ndërsa ndihmësi i Mourinho do të jetë Michael Carrick, i cili u tërhoq nga futbolli në ndeshjen e fundit të Premier League kundër Waford.
41-vjeçari Rapetti ishte trajneri i Inter U-19, kur Mourinho shkoi në Milano, por e afroi menjëherë në ekipin e parë dhe së bashku realizuan “tripletën” e trofeve në vitin 2010.