John Terry është një figurë e urryer e tifozëve të Manchester United, kjo pasi ka qenë një nga rivalët më të fortë gjatë kohës kur ishte te Chelsea.
Por, megjithëse ideja se ai mund të jetë pjesë e stafit teknik të Djajve mund të duket qesharake, është një mundësi duke parë deklaratën e fundit të Jose Mourinho-s.
Komentet e fundit të trajnerit portugez për sa i përket asistentit të ardhshëm pas largimit të Rui Faria-s kanë bërë tifozët e United të mendojnë se një nga kandidatët mund të jetë edhe Terry.
Mourinho ka sqaruar se do të përzgjedhë shumë shpejt asistentin e tij, duke shtuar se aktualisht nuk mund t’ia përmendë emrin për shkak se ai është akoma pjesë e një klubi tjetër.
“Është një person që ka punuar me mua më parë por nuk mund t’ia them emrin pasi është akoma i lidhur me një klub tjetër,” ishin fjalët e tij ekzakte.
Shumë tifozë në Twitter janë frikësuar se emri i tij mund të jetë John Terry, duke parë se ata kanë punuar më parë së bashku dhe anglezi është pjesë e Aston Villa-s.
