Llogari nga më të ndryshme bëhen në javën e fundit dhe vetëm një ndeshje mbetet jashtë tyre. Në “Zeqir Ymeri” Kukësi dhe Flamurtari luajnë për qejf dhe nuk ndikojnë në verdiktet e kampionatit. Në katër takimet e tjera gjërat janë të lidhura ngushtësisht dhe luhet për Evropën e mbijetesën. Llogaritë bëhen në aksion Korçë-Tiranë. Vllaznia përballet me Skënderbeun në ditën e festës së titullit dhe korçarët duhet të jenë shumë bujarë me shkodranët në rast se Kamza barazon me Partizanin.
Kuqebluve u duhet të fitojnë me një diferencë më të madhe se tre gola. Skuadra e Ahmatajt shpëton nëse mund të kuqtë, pavarësisht rezultatit në Korçë, ndërkohë që një humbje e tyre i krijon komoditetin Vllaznisë që të shpëtojë me një fitore çfarëdo. Ka edhe një skenar tjetër: “kokë a pikë”. Nëse shkodranët fitojnë 0-3 dhe Partizani-Kamza del 0-0, atëherë ekipi që qëndron përcaktohet me short, pasi bilanci në ndeshjet direkte është i njëjtë, ashtu sikurse golaverazhi.
KUPAT E EUROPËS – Luftëtari është më i favorizuari për vendin e tretë. U mjafton një pikë për ta siguruar. Mund të përfitojë edhe duke humbur, por kjo vetëm nëse Laçi e Partizani fitojnë ndeshjet e tyre me Teutën dhe Kamzën. Të tria skuadrat shkojnë me pikë të barabarta dhe kurbinasit shkojnë në vendin e pestë. Normalisht Luftëtari nuk mund të humbasë me dëshirë në Lushnjë. Nëse e bën, edhe Laçi e ka në dorë që të mos fitojë, çka bën që në këtë mes të përfitojë Partizani, që do të shkonte i treti, pasi me bluzinjtë është i favorizuar nga ndeshjet direkte. Kurbinasit në rastin më të keq mund të luftojnë për Kupën dhe digjet vendi i katërt nëse e fitojnë ata trofeun. Të gjithë këto llogari bëhen me Skënderbeun në Champions, ndryshe çështja e Europës është e mbyllur dhe rezultatet e javës së fundit nuk kanë ndonjë vlerë.
KATEGORIA SUPERIORE – JAVA 36
E MËRKURË, MË 23 MAJ 2018, ORA 16:00
Skënderbeu-Vllaznia
Partizani-Kamza
Laçi-Teuta
Lushnja-Luftëtari
Kukësi-Flamurtari
RENDITJA: Skënderbeu 72 pikë, Kukësi 62 pikë, Luftëtari 56 pikë, Laçi 53 pikë, Partizani 53 pikë, Flamurtari 45 pikë, Teuta 46 pikë. Kamza 43 pikë, Vllaznia 41 pikë, Lushnja 11 pikë
