Pas 7 sezonesh si futbollist, një pjesë e të cilëve edhe si kapiten, Domenico Criscito është larguar nga Zenit St. Peterburgu, për të vijuar karrierën e tij në Itali.
Mbrojtësi i majtë italian kishte prenotuar avionin paraditen e sotme, për të mbërritur në Itali, por tifozët rusë i kanë rezervuar një surprizë vërtetë të veçantë.
Një numër i madh i tyre kanë shkuar në aeroport për të thërritur në kor emrin e kapitenit, ndërsa në dorë mbanin edhe banderolat që i shpalosnin çdo javë në stadium.
Natyrisht që ky moment ka emocionuar pa masë Crisciton, që është përlotur para tifozërisë së Zenitit dhe ka falënderuar edhe publikisht ata për surprizën.
E nëse një tifozëri e përcolli, një tjetër pritet ta mirëpresë mbrojtësin, që tani do t’i bashkohet sërish Genoas, skuadër me të cilën ka luajtur që nga mosha 16-vjeçare e deri 7 sezone më parë.