Kryetari i Bashkisë së Kamzës, Xhelal Mziu që është njëkohësisht dhe financuesi i klubit të futbollit të Kamzës pritet të jetë objekt i Komisionit të Etikës dhe Disiplinës pranë FSHF-së për vetë deklaratat që ky i fundit ka thënë lidhur me disa parashkime ndeshjesh, të cilat në fund kanë rezultuar të sakta.
Mziu deklaroi pak javë më parë se Teuta do fitonte ndaj Laçit me rezultatin e saktë 1-0 dhe ashtu ndodhi. Një javë më parë, ishte sërish kryebashkiaku që deklaroi se, Vllaznia do fitonte ndaj Laçit me rezultatin 1-0, kështu ndodhi sërish. Lidhur me këtë takim, Mziu deklaroi se premioja që ishte premtuar për lojtarët e Vllaznisë iu ishte dhënë lojtarëve të Laçit.
Për të gjitha këto, Komisionet e FSHF-së pritet të nisin shqyrtimin e këtyre deklaratave dhe në mbledhje e ardhshme, pritet që Mziu të jetë objekt i Komisionit të Etikës dhe të kalojë në mbledhjen e Komisionit të Disiplinës që do zhvillohet këtë javë.
