Daniele Rugani është një nga mbrojtësit e rinj më premtues në Itali dhe në drejtim të tij kanë filluar të interesohen klube të mëdha. Ai sëbashku me mbrojtësin e Milanit, Alessio Romagnoli konsiderohen e ardhmja e Italisë. Pas paraqitjeve me Juventusin në edicionin e shkuar, por edhe me ekipin kombëtar në miqësoret e fundit, Chelsea ka treguar interes për italianin.
Mësohet se blutë e Londrës kanë bërë një ofertë për mbrojtësin e qendrës Daniele Rugani dhe një takim mes përfaqësuesve të lojtarit dhe shefave të gjigantëve të Serie A është duke vazhduar në “Palazzo Parigi” të Milanos. Sipas “Calciomercato.com”, Chelsea ka ofruar 30 milionë euro për të nënshkruar me mbrojtësin italian, i cili gjithashtu është duke u monitoruar nga Arsenali.
Çmimi i kërkuar i Juventusit është 40 milionë euro dhe “Zonja e Vjetër” po negocion me agjentin e mbrojtësit italian. Interesi i Chelsea-t për Rugani-n është prova se bisedimet mes Maurizio Sarri dhe bluve të Londrës mund të kenë një fund pozitiv shumë shpejt. Nuk është sekret se Sarri është një admirues i gjatë i mbrojtësit italian, që luajti nën urdhrat e tij te Empoli.
Kur Sarri u transferua në Napoli dhe Rugani u bashkua me Juventusin në verën e vitit 2015, trajneri italian u përpoq të nënshkruante me atë për të kaltrit, por Juventusi bllokoi transferimin e mbrojtësit italian, i cili konsiderohet si një nga qendrat më premtuese dhe më të talentuara të gjeneratës së tij. 23-vjeçari ka grumbulluar në Serie A 22 ndeshje të gjitha si titullar ndërsa ka shënuar edhe dy gola, ndërkohë ka zbritur dy herë edhe në Champions League dhe dy në Coppa Italia.
