Enis Gavazaj dhe Skënderbeu me shumë mundësi do t’i ndajnë rrugët këtë verë. Vetë sulmuesi anësor ka deklaruar me mbylljen e sezonit se menaxheri i tij po punon për të mbyllur transferimin jashtë vendit. Deri më tani nuk ka pasur asgjë të re, por nga Belgjika së fundmi vjen një lajm se për futbollistin e korçarëve interesohen tre klube, madje dy prej tyre u zbulohen edhe emrat. Charleroi dhe KSV Oostende janë emrat e klubeve që e kërkojnë, ndërkohë që është edhe një klub tjetër i interesuar, por emri i tij nuk bëhet i ditur.
Normalisht Skënderbeu do të tentojë të përfitojë nga shitja e sulmuesit dhe synimi është që të arkëtohen rreth 600 mijë euro. Një shumë jo e vogël, por që pretendohet nga ana e korçarëve. Para mbylljes së kampionatit janë bërë dy lëvizje drejt Belgjikës, teksa i pari u transferuar Kristal Abazaj tek Anderlecht për shumën e 750 mijë eurove, kurse më pas Guri kaloi tek Oostende. Për shkodranin Kukësi përfitoi 710 mijë euro.
ECURIA – Enis Gavazaj nuk e nisi mirë te Skënderbeu kur ekipi drejtohej nga Andrea Agostinelli. Me emërimin e Dajës në janar të vitit 2017 ai fitoi më shumë hapësira dhe nisi të tregojë vlerat e tij. Sezonin e fundit, që sapo u mbyll, sulmuesi anësor ka arritur të gjejë tre herë rrugën e rrjetës në kampionat, si dhe ka shënuar një gol në Europa League. Në kampionat ai është aktivizuar në 29 takime, 26 prej tyre i ka nisur nga minuta e parë. Ky numër ndeshjesh është ndikuar edhe nga një dëmtim që pat pësuar në ndeshjen e kupave të Europës dhe për rreth 45 ditë ka qëndruar jashtë fushave të blerta.
