Hamburgu ra por herë të parë në historinë e tij nga Bundesliga pas një sezoni me shumë probleme. Skuadra nuk mundi të arrinte rezultatet e duhura dhe shpesh ndaj lojtarëve të saj janë marrë masa, siç ndodhi në rastin e Mavrajt, i cili kaloi tek ekipi i dytë kohët e fundit.
Por duket se situata ka ndryshuar tashmë. Hamburgu ka marrë një drejtor të ri sportiv, Ralf Beker, i cili, bashkë me trajnerin Kristian Titz, po planifikon skuadrën e sezonit të ardhshëm. Dhe në planet e tyre është edhe Mavraj, të cilit do t’i jepet një shans i dytë.
“Ne po punojmë me lojtarët që janë nën kontratë. Dua të them se do të ketë një mundësi për Uollas dhe Mergim Mavrajn, të cilët u dërguan në ekipin e dytë kohët e fundit. Të dy kanë kontratë me Hamburgun. Po e shohim situatën me shumë kujdes dhe këta lojtarë meritojnë një shans të dytë”, – tha Beker.
Kështu, mbrojtësi me përvojë i kombëtares kuqezi ka rastin të tregojë se vlen dhe të vazhdojë të luajë për Hamburgun në Bundesligën 2.