E ardhmja e mesfushorit Ledian Memushaj duket larg Benevento. Mesfushori vlonjat duket se ka tërhequr interesin e Pescara dhe është gati të kthehet në klubin që i dha shkëlqimin më të madh në futbollin italian. 31-vjeçari mbylli një sezon të vështirë te Benevento, me trajnerin Roberto De Zerbi që nuk e preferonte mesfushorin e kombëtares shqiptare. Edhe pse ai shihej si një nga mesfushorët më të talentuar në skuadrën e Benevento, ai e la për pjesën më të madhe të kohës në stol. Pas përfundimit të Serie A, ai u largua nga klubi që në sezonin e ri do të luajë në Serie B, megjithatë edhe Memushaj duket se do të largohet. Faqja e gazetarit Gianluca Di Marzio, shkruan se 31-vjeçari mund të kthehet te Pescara.
Në sezonin e kaluar që ishte i treti për të në Serie A, mesfushori shqiptar grumbulloi 17 ndeshje në Serie A, prej të cilave 15 si titullar. Interesant është fakti se me afrimin e trajnerit të ri De Zerbi, Memushaj ka zbritur vetëm 6 herë në fushë. Vlonjati që në ndeshjet e fundit nuk është grumbulluar në kombëtaren shqiptare as nga trajneri Christian Panucci duket se preferon të kthehet te Pescara, gjithsesi gjithçka do të varet nga klubi i tij Benevento që ka të drejtën e kartonit. Në kohët e fundit disa klube nga mesi i tabelës në Serie A, kanë treguar interes, por në fund ai që do të vendosë është vetë mesfushori. Një nga sezonet më të mira në karrierë Memushaj e ka patur me fanellën e Pescara në Serie B (edicioni 2015-2016), ku shënoi 11 gola në 32 ndeshje, ndërsa klubi siguroi ngjitjen në sallonin e madh të futbollit italian. Në këtë fushatë Pescara konkurron në Serie B dhe afrimi i tij do të ishte me vlera të mëdha, për objektivin rikthim në Serie A.
