Trajneri i Liverpool Jurgen Klopp do të kishte dëshirë të punonte përsëri me Mario Gotze që aktualisht luan te Borussia Dortmund.
“Ai tani është në mes të të 20-ave të tij, kështu që ka edhe dhjetë vite karrierë. Kohë shumë e gjatë ku gjithçka mund të ndodhë. Por po të ishte nga ana ime, do të kisha shumë dëshirë të ribashkohesha me të,” shprehet 50-vjeçari për ish-lojtarin e tij me të cilin ka fituar dy herë kampionatin gjerman.
Në sezonin 2010/11, atëherë 18-vjeçari, shpërtheu në ekipin e parë falë Klopp. Por edhe tani, dyshja ka ruajtur kontaktin.
Klopp pranon se është munduar disa herë të marrë lojtarin gjatë viteve të fundit. “Mario e di mirë, që e kam provuar disa herë ta transferoj. Por deri tani nuk ka funksionuar,” shprehet trajneri.
Dy vite më parë u mundua ta sillte te Liverpool, por në fund Gotze zgjodhi të rikthehej te Borussia. Klopp mund të riprovojë përsëri për fantazistin, megjithëse Gotze ndihet mirë në klubin gjerman.
