Mohamed Salah është rikthyer në stërvitje të plotë me grupin dhe të gjithë shpresojnë shumë se do të luajë të premten në ndeshjen e parë të skuadrës në Kupën e Botës kundër Uruguait. Sulmuesi i Liverpool është stërvitur edhe veçmas me fizioterapistin për të parë reagimin e krahut të tij të majtë, të dëmtuar në finalen e Champions League pas një ndërhyrjeje të Sergio Ramos.
Por sipas fotografive të publikuara në faqen e Federatës Egjiptiane të Futbollit në llogarinë e saj në Twitter, Salah duket në formë dhe dita ku të gjithë i druheshin mungesës së tij në Botëror tashmë është thjesht një kujtim i largët.
Të gjithë te Egjipti, por me siguri të gjithë tifozët e futbollit të bukur, presin me padurim rikthimin e tij në fushë. “Ai po përmirësohet gradualisht. Sidiqoftë nuk mund ta konfirmojmë ende që do të jetë në fushë për ndeshjen e parë”, tha menaxheri i skuadrës. “Por mund të them se shpresojmë të luajë në këtë ndeshje”.
Duke qenë se është vendosur në grupin A, aventura e Egjiptit në Botëror nis që të premten, në ndeshjen e dytë të turneut, kundër Uruguait në Ekaterinburg. Më pas “Faraonët” ndeshen me Rusinë në Shën Pjetërburg për të mbyllur grupin me përballjen ndaj Arabisë Saudite.