Ander Herrera ka refuzuar mundësinë për t’u kthyer te Athletic Bilbao. Mesfushori spanjoll ka edhe një vit kontratë me “djajtë” dhe duke qenë se në qershor 2019 do të jetë i lirë nga çdo lidhje kontraktuale ai ka përfunduar në qendër të dëshirave të disa prej klubeve europiane, kryesisht në La Liga.
28-vjeçari ndihet i lumtur në “Old Trafford” dhe ka ndërmend të luftojë për vendin e titullarit, pavarësisht se situata është komplikuar, sidomos pas blerjes së brazilianit Fred për 60 milionë euro.
Gjithsesi, Herrera ka ndërmend të qëndrojë te United, të paktën deri në janarin e ardhshëm, kur do të vendosë përfundimisht të ardhmen e tij. Kjo është arsyeja përse menaxheri i tij ka refuzuar çdo ofertë të mundshme.
Krahas Bilbao, që dëshironte te rikthente në klub duke e bërë futbollistin më të paguar në historinë e tyre, edhe Atletico Madrid kishte shfaqur një interesim për lojtarin, por mesa duket Herrera do të luajë deri në fund kartat e tij te ekipi i Jose Mourinho.