Frikë në kampin e kombëtares peruane. Sipas asaj që raporton Federata Peruane e Futbollit, sulmuesi i kombëtares amerikano-latine, Jefferson Farfan është shtruar në spital, pas një përplasje kokë më kokë me një shok të skuadrës gjatë stërvitjes.
33-vjeçari u përplas me një nga portierët e ekipit gjatë stërvitjes të së shtunës në “Khimki”. Farfan, i cili aktivizohet në Rusi me Lokomotivën e Moskës, është në një gjendje të qëndrueshme, por ende po monitorohet nga afër.
Federata e futbollit e Perusë deklaroi se rezultatet fillestare ishin të favorshme për lojtarin dhe se Farfan u transferua në spital, pasi mori ndihmën e parë në fushën e lojës.
“Los Incas” janë eliminuar tashmë nga Kampionati Botëror pas dy humbjeve me rezultatin identik 1-0 ndaj Danimarkës dhe Francës në Grupin C. Ndeshjen e fundit do ta zhvillojnë përballë Australisë më 26 qershor.
