Pas Kupës së Botës, Lionel Messi do të udhëheqë eksodin masiv të yjeve të Argjentinës nga futbolli ndërkombëtar. Argjentina mban ende shpresa në një kualifikim të munshëm për në fazën e 1/8 të finales, ndonëse shanset janë minimale pas disfatës zhgënjyese 3-0 ndaj Kroacisë. Nga ana tjetër, trajneri Jorge Sampaoli po përballet me një revoltë të futbollistëve, me skuadrën që thuhet se është zhgënjyer nga stili i tij menaxherial.
Kur kishin mbetur edhe 36 minuta lojë në ndeshjen ndaj Kroacisë, me Argjentinën që mundej 1-0, Sampaoli nxorri nga loja yllin e Manchester City, Sergio Aguero. Ky i fundit, në përfundim të ndeshjes tha se Sampaoli “mund të thotë çfarë të dojë”. Ndërkohë, nga burime pranë kontigjentit të Argjentinës raportohet se një numër i konsiderueshëm i futbollistëve në cilësinë e “senatorëve”, do të largohen nga përfaqësuesja, në përfundim të Kupës së Botës në Rusi, duke u kryesuar nga Messi dhe duke përfshirë Agueron, Marcos Rojo, Ever Banega, Angel Di Maria, Javier Mascherano madje me mundësi edhe Gonzalo Higuain.