Një vit Barcelona ishte e gatshme të bënte gjithçka për të siguruar shërbimet e Marco Verrati, por PSG-ja ishte e vendosur për të mos e lejuar largimin e mesfushorit.
Gjithsesi tani situata duket se ka marrë një tjetër drejtim, pasi trajneri i ri klubit parizien nuk e konsideron më italian si pjesë e projektit të tij, nisur nga kjo duket se eksperienca e Verratit në “parkun e princave” i ka orët e numëruara.
Barcelona ndryshe nga një vit më parë, tashmë nuk ka më interes për mesfushorin dhe menaxheri i lojtarit Mino Raiola është vënë në lëvizje për ti gjetur një skuadër të re.
E ardhmja e Verratit mbetet një dilemë e madhe. Largimi i italianit duket i pashmangshëm pasi PSG duhet të largojë nga radhët e ekipit disa prej yjeve që ata kanë për shkak të rregullave të Fair Play Financiar dhe 25-vjeçari është pjesë e kësaj liste.
Rikthimi në Itali është një opsion më se i mundshëm me Juventusin që në disa raste e ka shprehur hapur faktin që Verrati është një element që do t’i shërbente shumë mesfushës së bardhezinjve.
