Trajneri Gasperini është në hall për prapavijën. Atalanta, që në nisje të përgatitjeve humbi një mbrojtës, i cili u dëmtua dhe prapavija është e gjitha për t’u sistemuar. Rikthimi i Gjimshitit nga Benevento, pasi i përfundoi huazimi, duket se nuk mjafton për të garantuar qëndrimin e shqiptarit. Për momentin, ai është i pesti në radhë për nga renditja e lojtarëve të prapavijës, mirëpo problemet e shfaqura në ndeshjen e Ligës së Europës kanë vënë në lëvizje drejtuesit.
Tek Atalanta po kërkojnë një qendërmbrojtës dhe ky nuk është aspak lajm i mirë për shqiptarin. Për momentin ai nuk bind që të ketë rol titullari, por edhe për qëndrimin në stol, duket se drejtuesit janë të lëkundur. Momentalisht, largimi i tij është bllokuar, pasi klubi kërkon të shmangë emergjencën, por në rast të një afrimi cilësor, Gjimshiti do duhet të vihej në lëvizje për të gjetur një skuadër tjetër. Benevento ka qenë një nga skuadrat e interesuara për ta rikthyer sërish në ekip, por mbetet për t’u parë.
