Kamza ka nisur përgatitjet dhe hapi i parë ishte emërimi i trajnerit të ri. Bledar Devolli la Kosovën dhe u rikthye të bashkëpunojë me presidentin Naim Qarri. Më pas u zyrtarizua si drejtor sportiv menaxheri Andi Matraxhiu dhe tanimë kanë nisur të hidhen edhe firmat.
Bruno Arrabal ka qenë i pari që ka rinovuar, kjo sapo përfundoi kampionati, kurse tani të njëjtën gjë ka bërë edhe mbrojtësi malazez Igor Cukovic. Sot ai ka nënshkruar kontratën që e bën pjesë të Kamzës edhe për një sezon. Në fakt ai kishte kontratë deri në janar dhe klubi normalisht ka dashur ta ketë deri në fund dhe i ka ofruar marrëveshjen e re, që është pranuar nga lojtari. Cukovic bëri paraqitje të mira në gjysmën e dytë të sezonit të shkuar, gjë që është shpërblyer.
Te Kamza po punojnë për të bërë edhe të tjera lëvizje, pasi largimet kanë qenë të shumta me përfundimin e kampionatit. Sulmi është reparti më problematik. Kapiteni Sebino Plaku i është bashkuar Kukësit, kurse Racic ka mbyllur bashkëpunimin dhe do e vijojë gjetkë karrierën. Gjithashtu edhe lojtarë si Fili kanë shpallur divorcin, ndaj edhe duhen bërë afrime të tjera dhe me peshë në ofensivë.
