Mungon vetëm zyrtarizimi, por palët janë duke mbyllur detajet e fundit për transferimin e sulmuesit argjentinas Gonzalo Higuain nga Juventusi te Milan. Duket se takimi i djeshëm mes drejtuesve të dy skuadrave, takim që ka zgjatur mbi 4 orë, ka vulosur këtë transferim, që do të jetë në formë huazimi. Milan do të derdhë në arkën e Juventusit një shumë mes 18-20 milionë eurove për huazimin, me të drejtë blerje për shumën e 36 milionë eurove pas një viti.
Tashmë në tryezë janë ulur avokatët e dy skuadrave për të kompletuar detajet e fundit dhe pritet që brenda 48 orësh sulmuesi argjentinas të lërë Torinon për t’u transferuar në Milano. Juventus dhe Milan kanë diskutuar dhe kanë arritur një marrëveshje edhe në lidhje me një shkëmbim mes Leonardo Bonucci, që do të rikthehet te bardhezinjtë pas një viti dhe Mattia Caldara, që do të shoqërojë Higuain dhe do të luajë me kuqezinjtë sezonin e ardhshëm.
