Nebil Fekir po shndërrohet avash-avash në një çështje tek Lyon, me francezin që po vijon të kërkohet nga shumë klube Europiane, ku në listë tashmë është shtuar dhe Real Madrid.
25-vjeçari tashmë kampion Bote me Francën është prej kohësh i “shigjetuar” nga Liverpul, me anglezët që i vajtën shumë pranë transferimit të tij deri në momentin kur presidenti i klubit francez të deklaronte tërheqjen nga marrëveshja.
Është pikërisht numri një i Lyon Jean-Michel Aulas që ka ndërhyrë sërish për të sqaruar situatën. “Fekir nuk do të ikë nga klubi, madje do t’i rinovojmë kontratën shumë shpejt”, kanë qenë fjalët e presidentit për të mediat vendase.
Në gjithë këtë situatë enigma më e madhe mbetet dëshira e vetë lojtarit, që sipas miqve të tij të afërt dëshiron një aventurë të re, por duket se drejtuesit nuk janë dakort me këtë gjë.
